Ajuda generau
Qué ei era sedença electrònica?
Ei un lòc d’internet a compdar d’a on es ciutadans pòden exercir telematicament eth dret d’accès ara informacion, es servicis e es tramits d’ua entitat, entà complir atau es exigéncies dera legislacion en vigor. A garentida dera integritat e veracitat deth contengut, per çò qu’era entitat titulara dera sedença n’ei era responsabla.
Era informacion que s’i pòt trobar ei era relativa a:
- Normativa, documents publics, diaris oficiaus, convocacions d’aufèrtes de trabalh, perfil deth contractant, actes e edictes, etc.
- Tramits e gestions que se pòden hèr a trauès d’internet, sense auer-se de desplaçar ara entitat. Es tramits en linha faciliten era relacion entre era ciutadanetat e era Administracion e l’apròpen as persones.
A qui va adreçada?
A toti es interessats que causisen d’interagir damb era entitat per mejan d’internet.
Qué se pòt hèr ena sedença electronica?
Presentar documentacion en Registre, consultar er estat des dorsièrs, recéber notificacions electroniques e hèr gestions qu’enquia ara se hègen presenciaument. Consultar informacion referenta a normativa, subvencions, documents publics, diaris oficiaus, convocacions d’aufèrta de trabalh, perfil deth contractant, etc.
Es tramits hèti ena sedença an era madeisha validitat qu’es presenciaus?
Òc.
Ei segur utilizar es servicis dera sedença?
Era vòsta comunicacion damb era sedença ei segura. Tota era informacion viatge chifrada e es certificats electronics garentissen era identitat d’andues parts. Es donades personaus que manatz per internet son chifrades e, un viatge sauvades enes nòsti sistèmes, les protegim damb es mejans de besonh, d’acòrd damb era normativa de proteccion de donades personaus.
Quan se pòt utilizar era sedença electronica?
S’i pòt accedir entà hèr tramits e consultar informacion, pendent 24 ores es 365 dies der an e de quinsevolh lòc estant.
Cau tier en compde qu’es tramits hèti es dies non obrants se comprenen efectuadi eth prumèr dia obrant següent (consultatz er apartat de dies obrants e non obrants).
Quina data e ora se tien en compde entara computacion de tèrmes?
An validitat legau era data e era ora oficiaus dera sedença, e non es dera equipa a compdar deth quau se hè eth tramit (tau coma dispause era normativa en vigor). Se tien en compde es de confirmacion deth tramit, ei a díder quan eth ciutadan confirme era sollicitacion o es documents e recep eth recebut deth Registre. Per exemple, s’eth tèrme d’un tramit administratiu acabe eth 20 de seteme e començatz a emplir era sollicitacion tàs 23 h 50, mès acabatz eth tramit tàs 00 h 10 de londeman, era sollicitacion serà dehòra de tèrme.
Qué ei era còpia electronica autentica?
Ei un document electronic, signat digitaument, qu’ei identic e a era madeisha eficacitat juridica qu’eth document electronic originau qu’apareish ena sedença electronica en moment que se hè era consulta. Cau tier en compde qu’eth document digitau a validitat legau, mès era còpia estampada en papèr non n’a.
Ei er equivalent electronic dera còpia autentica o autorizada en papèr, e ei regulada pera lei.
Qué ei eth registre electronic de publicacions?
Eth registre de publicacions dera sedença electronica recuelh es evidéncies electroniques dera publicacion e era disponibilitat des contenguts dera sedença.
Es evidéncies electroniques son era tralha que dèishe eth contengut laguens dera sedença. Permeten demostrar qui a amiat a tèrme cada accion, eth moment en que s’a publicat cadun des contenguts e eth temps qu’a estat disponible ena sedença. Tanben, se pendent aguest temps eth contengut a variat. Era auta caracteristica des evidéncies electroniques ei era preservacion corrècta dera cadea de sauva, de sòrta que i age garentides qu’era pròva non se pòt manipular. Donques, se pòt presentar deuant d’un tribunau, coma pròva fehasenta e veridica. D’aguesta manèra, es drets des ciutadans e era independéncia e era transparéncia des contenguts dera sedença electronica demoren garentidi.
Qué ei era signatura electronica?
Ei eth corrop de donades en forma electronica (associades o consignades amassa damb d’autes) que permet identificar eth signatari, escambiar informacion damb autes persones e entitats de manèra segura e signar electronicament es donades que se manen, de sòrta que se’n poguen verificar era integritat e procedéncia.
Per repòrt des donades consignades electronicament, era signatura electronica reconeishuda a era madeisha valor qu’a era signatura manuscrita en çò que hè as donades consignades enes documents en papèr.
Recomanacions de seguretat
Jamès non vos demanaram per corrèu electronic ne eth certificat ne eth còdi PIN. Se quauquarrés vos lo demane, maufidatz-vos.
Mantietz actualizat eth sistèma operatiu, antivirús e navegador.
Acceditz ara sedença electronica a compdar d’un navegador web fidable. Non i acceditz a compdar de ligams que trobetz en corrèus electronics ne en d’autes webs.
Non escriuetz eth còdi PIN deth certificat, se i a quauquarrés apròp que pogue distinguir qué picatz.
Non sauvetz eth còdi PIN deth certificat, s’ètz en un ordenador que non ei er abituau.
Barratz corrèctament eth navegador, se hètz a servir ordenadors de lòcs publics o as quaus agen accès tresaus persones.
Escuelhetz un còdi PIN malaisit d’endonviar, entà refortir-ne era seguretat. Non empleguetz donades facilament dedusibles, coma era data de neishença, o que portetz anotades en bèth lòc.
Se non trobatz çò que cercatz o auetz de besonh ajuda
Ena part superiora dreta dera pantalha trobaratz un cercaire que vos facilitarà er accès as contenguts.
Ajuda de certificats
Qué ei un certificat digitau?
Ei un document electronic que garentís era identitat d’ua persona en un sistèma informatic e permet hèr tramits telematics damb plees garentides tecniques e juridiques, en diferenti portaus o plataformes.
Es certificats an d’èster emetudi per ua entitat de certificacion (entitat de confidança que s’encargue de verificar es identitats certificades).
Quin aspècte a un certificat digitau?
Pr’amor que se tracte d’un fichèr electronic, eth certificat pòt èster contengut en ua memòria USB, en un CD, installat en un ordenador o laguens d’ua carta damb un chip integrat.
Entà saber se ja auem bèth certificat installat en ordenador, lo podem cercar en navegador web:
S’eth navegador ei Internet Explorer, vos cau accedir a:
Airines - Opcions d’Internet - En unglet "Contengut", sarratz eth boton "Certificat". S’eth certificat ei installat corrèctament, apareisherà en unglet "Personau" d’aguesta hièstra.
S’eth navegador ei Mozilla Firefox, vos cau accedir a:
Menú airines – Paramètres – Privadança e seguretat – En apartat “Certificats”, clicatz sus “Mòstra es certificats”. S’eth certificat ei installat corrèctament, se poderà visualizar en unglet “Es vòsti certificats”.
Entà qué servís un certificat digitau?
Permet:
- Identificar-se e garentir era identitat der usatgèr en internet.
- Signar documents electronics damb validitat legau.
- Manar informacion entre dues parts de manèra segura e intègra.
- Accedir ath servici mès dirèctament, per çò que non cau rebrembar er usatgèr e era clau.
- Accedir a informacion personau e a contenguts limitadi.
Com se pòt obtier un certificat digitau?
Cau sollicitar-lo a ua des autoritats de certificacion reconeishudes.
Un viatge sollicitat, cau installar-lo en ordenador.
Eth certificat idCAT, qu’emet era Agéncia Catalana de Certificacion, ei gratuït. Eth sòn principau avantatge ei era portabilitat, per çò que se pòt utilizar en quinsevolh ordenador.
Es naui DNI ja incorpòren certificats electronics. En aguest cas, entà utilizar-les ei indispensable un lector de cartes. Podetz trobar mès informacion en web oficiau deth DNI electronic http://www.dnielectronico.es.
Era Fabrica Nacionau de Moneda e Timbre tanben aufrís un certificat digitau largament reconeishut. Podetz tramitar-ne era sollicitacion a trauès deth sòn web http://www.fnmt.es
Com s’utilize un certificat digitau?
Entà utilizar-lo, cau:
- Dispausar d’un certificat digitau reconeishut peth dorsièr de servicis e tramits (idCAT, DNIe...).
- Auer un dispositiu USB o lector de cartes chip compatibla damb eth certificat, en cas que sigue en supòrt fisic.
- Auer installadi corrèctament es compausants de logiciau qu’a provedit era entitat emissora deth certificat, e tanben es drivers deth dispositiu USB o lector de cartes.
Quina validitat legau a un certificat digitau?
Segons era normativa sus era matèria, per çò qu’ei des donades consignades electronicament era signatura electronica a era madeisha valor qu’a era signatura manuscrita en relacion damb es consignades en papèr.
Quini certificats s’admeten?
En aguesta sedença, se pòden utilizar es sistèmes de signatura electronica incorporadi ath document nacionau d’identitat (DNIe). Tota era informacion relacionada damb aguest dispositiu se pòt trobar en http://www.dnielectronico.es/.
Tanben se pòt utilizar quinsevolh des següenti certificats emetudi per bèra ua des autoritats de certificacion classades pera Agéncia Catalana de Certificacion (CATCert):
- IdCat (Agéncia Catalana de Certificacion)
- Ceres Fabrica Nacionau de Moneda e Timbre - Reiau Casa dera Moneda (FNMT - RCM)
Se pòden utilizar diuèrsi certificats?
Podetz auer mès d’un certificat en ordenador. En moment d’emplegar-lo, se vos demanà quin voletz utilizar.
Resolucion de problèmes
Qué cau hèr se non s’i pòt accedir damb certificat?
- Verificar qu’eth navegador coneishe eth certificat.
- Se non se tròbe eth certificat en navegador:
- Se s’utilize ua carta damb chip o un clauèr USB, cau assegurar-se que ei connectada corrèctament.
- Assegurar-se d’auer seguit corrèctament es instruccions d’utilizacion provedides pera entitat emissora deth certificat.
- Se maugrat tot non se tròbe eth certificat, cau contactar damb eth servici tecnic der emissor deth certificat.
- Se trobatz eth certificat en navegador:
- Se se navègue damb Firefox e s’a mès d’un certificat, en moment de trigar certificat peth prumèr còp se pòt mercar era opcion “Rebrembar aguesta seleccion”, entà qu’utilize per defècte eth madeish certificat.
- Verificar qu’eth certificat non age caducat.
- Verificar qu’eth certificat non mòstre cap error de verificacion.
- Verificar que sigue un des certificats admetudi en web.
- Barrar e reiniciar eth navegador.
- Reiniciar er ordenador e tornà’c a sajar.
Qué cau hèr se non s’i pòt accedir damb eth clauèr IdCat?
Installar eth logiciau deth clauèr.
Entà Internet Explorer:
- Installar es claus publiques d’idCAT a compdar de http://www.idcat.cat
Entà Mozilla Firefox:
- Installar eth supòrt entà Mozilla Firefox a compdar d’Inici – programes – CATcert – clauèr idCAT o installar es claus públiques d’idCAT a compdar de http://www.idcat.cat.
Assegurar-se qu’eth clauèr ei connectat e qu’er ordenador lo reconeish.
Assegurar-se qu’eth certificat non ei revocat, blocat o qu’a caducat.
Se contunhe de hèr error, reiniciar er ordenador.
Resolucion de problèmes deth clauèr idCAT
902 901 080
Qué cau hèr se non s’i pòt accedir damb eth DNI electronic?
- Assegurar-se que s’a installat eth logiciau corrècte de http://www.dnielectronico.es.
- Assegurar-se que s’an installat es claus publiques de besonh a compdar de http://www.dnielectronico.es.
- Assegurar-se qu’er ordenador a installat corrèctament un lector de cartes criptografiques.
- Assegurar-se qu’eth DNIe s’a inserit corrèctament laguens deth lector de cartes criptografiques.
- Verificar qu’eth certificat non age caducat o sigue revocat o blocat.
- Se contunhe de hèr error, sajar de reiniciar er ordenador.
Resolucion de problèmes deth DNIe en Servici d’Atencion ara Ciutadanetat
http://www.dnielectronico.es
900 364 463